كيف تكسبين قلب زوجك !

اتسألت كثير اوى مؤخراً .... عن موضوع حقيقي شيق وملتهب .. ازاى اقدر اخلى زوجى زى الخاتم فى صباعى  .. واحب ان انوّه ان اللى حكتبه حيعلى الضغط عند الستات ... بس اعمل ايه مقدرش اكتم الحق :DD

1. أول حاجة لازم نتفق ان جوزك مش خاتم :)) ... ليه؟ لان الخاتم ملكك .. وجوزك مش ملكك .. فكك من الجو ده .. لازم تغيرى فكرة زى ده .. لان بلا شك لو بتعامل مع جوزى انه ملكى حتوقع حاجات كثير مش صحية  وحتخلى تصرفاتى تخنقه اكثر ما تشده

2. جوزك مش صاحبتك ... أيوه ... ركزى كده حتلاقى نفسك انك بتعاملى جوزك كأنه البست فريند .. مطلوب منه انه يسمع حضرتك وانتى بتحكى عن الست اللى بتشتغل معاكى ازاى طلعت عينك وبدل ما تغسل الهدوم وتنشرها سابتها تعطن (حوار لسه كنت عاملاه قريب  ) .. جوزك مش للنوع ده من الفضفضة بالتفاصيل المملة ... جوزك تروحى تقوليله "جملة" ونتهيها بنقطة وبس ....

3. اما تلاقى جوزك قاعد ادام التليفيزيون وماسك الريموت او ماسك الموبايل .. او حتى على الكمبيوتر... والله العظيم ده مش وفته تلزقى فيه وتدلعى وترغى ......... الوقت ده مقدس ... بتاعه لوحده ... وقت بالنسبة له فاضى مبيفكرش فيه تماماً .... مجرد وجودك فى الصورة يخليه يفكر فيخليه يتعصب ... سيبيه لوحده يا فوزية.. اديله مساحته من غير تذمر او نكد :))

4. لما تحتاجى تتكلمى معاه فى امور مهمة بخصوص البيت او الصيانات ... خدى ميعاد يناسبكم سوا عشان تتكلمى فيه ... اختيار الوقت المناسب بيفقرق جدا

5. انا عارفة انك اخدتى معايا تربية ايجابية وبتعرفى تربي بالطريقة الحديثة ...... بس ليه وقعت منك جزئية مهمة فى التربية قلتها ؟ وهى ان لما الزوج يتواجد خدى تربيتك على جنب كده وسيبيه هو يتولى الامر ؟ ... بلاش تقفى قصاده ... سيبى له القيادة ويبقى التوجيه لوحدكم واتفقى معاه على القواعد العامة بعيد عن عيون ولادك

6. جوزك بينتقدك ؟؟؟ ... مممم تلات اربع الرجالة فيهم الطبع ده على فكرة ومش كلهم بينتقدوا عشان بيقللوا منك ... بالعكس هو بينتقد عشان فاكر انه بيصلح وبيساعد .... صعب تاخدى النقد بالفكرة الايجابية ده ؟  عشان تفصلى من مود القفش من انتقاده استقبلى كلامه بدم خفيف وابتسامة ... واقلبى الموضوع ايجابى ... بس متستخفيش اوى :))

7. سر جوزك كله يتلخص فى "نجاحه" ... لازم تعرفى ازاى تشجعيه .. ازاى تسانديه وتغضى الطرف عن فشله .. ازاى متركزيش على عيوبه .. ازاى تشعريه انه مخليكى اسعد زوجة .. ازاى ان عمرك ما حتلاقى زيه .. حقيقى كل ده ولو بعضه غير حقيقي بيخليه فى قمة السعادة وده صدقينى حيعود عليكى وعلى بيتك بسعادة لا توصف ..

8. اشعريه بذاتك من غير ما تعلى عليه ... اشعريه انك ليكى فكرك وانك فى نفس الوقت متقدريش تستغنى عن رأيه .. حسسيه ان اى نجاح ليكى فده بسبب انه فى حياتك .. حسسيه انك متقدريش تعيشى من غيره حتى لو الواقع عكس ده .. لازم تعرفى ازاى تتسندى عليه من غير ما تخنقيه وتثقلى كاهله ... تتسندى بدلع عشان هو رجلك .. رَجُلِك :)) احسن تقريها غلط :))

9. اوعى تلفى حواليه .. اوعى تركزى عليه وعلى تصرفاته عمتا ... اشغلى نفسك بحاجة مفيدة .. حققى ذاتك .. دورى على هدف (فى حدود رضاه) .. تفرغك التام "عقليا" له حيخلى حياته جحيم ... لاننا كستات جُبِلنا على اننا نفكر زيادة .. وده مش فى مصلحته ومصلحتك 

ده اهم النقاط .. وممكن يكون للحديث بقية ... بس حختم بــــــ"كونـــى له خديـــجة .. يكن لك محمدا "

صل الله عليه وسلم ... ربنا يديم المحبة .. ومن غيرضرب ها 

‫#‏انتِ_ست_وهو_راجل‬
‫#‏كونى_له_أنثى_يا_فوزية‬
‫#‏بتوع_حقوق_المرأة_يمتنعوا‬ 

وتكملة الحديث "ازاى تكسب قلب مراتك " http://goo.gl/7g5bli
http://goo.gl/7g5bli