كيف تكسب قلب زوجتك

وندخل بقى عش الدبابير .. ونقول ازاى حضرتك "ايها الرجل" تعاشر دبور من غير ما تتلسع :DD ......... معلش القافية حكمت .. مش ده العنوان بغلس  ..

وأخيراً اللحظة اللى حنطالب فيها بحقوقنا ... ونبدأ نوضح للراجل اهم سؤال بيمر فى مخه ... ازاى أخلى مراتى تعمل اللى ريهام قالت عليه  .. نتكلم جد بقى ..

""ازاى تكسب قلب مراتك """

1. اولا لازم نتفق ان مراتك مبتشتغلش عندك  ... لها حقوق مثل ما لديك حقوق .. بالعكس الرسول صل الله عليه وسلم قالك "رفقاً بالقوارير " .. يعنى بص التشبيه مراتك كانها ازاز بسهولة ممكن تكسرها لو اتصرفت بغشومية  .. فلازم ترفق بها فى كل الأمور .. لا تحملها ما لا طاقة لها به .. كن لها رجلاً يخفف عنها فوالله لو دخلت دماغ مراتك لأشفقت عليها مما تفكر فيه (عارف الكورة السلك اما تلمس كهربا فى كل حته .. اهو احنا الستات مخنا كده بالظبط مش بيبطل تفكير فى كل حاجة واى حاجة"

2. انا عارفة ان انت بتزهأ اوى من الرغى والتفاصيل الدقيقة اللى احنا بنقولها .. حاول تحتويها ..الست اما بتبقى مضغوطة محتاجة بس حد يسمعها "من غير ما يحاول يحل المشكلة " .. يسمعها وبس للاخر .. هى اما بتتكلم بتفهم هى عايزة ايه وحاسة بايه وكمان بتكون حلت المشكلة .. اه والله زمبؤلك كده.. صعبة ؟

3. احنا متفهمين ان انت اما بترجع من الشغل بتحتاج تفصل عشان تشحن وتستعيد قواك .. والله متفهمين .. بس هو الشحن ده مستمر ؟ .. ولا هى دخلت عندك فى عادة سلبية وتهرب من الواقع ؟ ... سدد وقارب .. اشحن شوية وفهمها ان انت لو نمت شوية او فصلت بالنت او تليفيزيون مثلا ساعتين .. ساعة حسب احتياجك وظروفكم سوا .. ساعتها حتقدر تهتم بيها .. وليكن بعد نوم الاطفال لكم ولو دقائق تنتبه فيها لها ... كلمة حنينة .. طبطبة .. تفهم لمشاعرها حيخيليها تشيلك فوق راسها وادلعك على الاخر والله

4. على فكرة البيت بيتكم انتوا الاتنين ... ومش معقولة الست تحفى وراك عشان تغير لمبة ولا تصلح ثلاجة .. البيت حيخرب يا مدحت  .. ممكن تتفق معاها على وقت مريح لك تتابع معها صيانة المنزل ... وكمان لو عملتوا اجتماع اسرى كل اسبوع فى ميعاد محدد تناقشوا فيه دخليات اسرتكم بايجابية حتريحك من انها تفضل حاسة ان مملكتها شايلاها لوحدها فوق دماغها

5. على فكرة .. بحق وحقيقى مراتك بتفهم فى ولادكم اكثر .. بحكم طبيعتها الانثوية .. ربنا فطرنا على كده ... وبطبيعة تواجدنا حواليهم اكثر ... يا ريت تحترم افكارها .. يا ريت تسمع هى نفسها تمشى البيت على اى قوانين ... اديها فرصة ان انتوا تتفقوا على اسلوب موحد للتربية .... ولو سمحت احترمها ادام اولادك .. خلى دايما تعليقاتك على تربيتها بينك وبينها ...

6. ممكن تفكر تقول كلام حلو اد الكلام الناقد اللى على طول هى بتسمعه ؟ .. يعنى لو عرفت توازن بين ارائك السلبية وارائك الايجابيه فيها وفى حياتكم حتريحها وترتاح ............ على فكرة الكلمة الحلوة صدقة .. والست حقيقى ممكن تكسبها بكمة حنبية ونظرة حب ... طلباتنا بسيطة جدا 

7. لازم تفهم ان من اهم اسباب نجاحك .. انك تسعدها ...... حاول تفكر فى خلال يومك على حاجات صغيرة غير مكلفة ممكن تعملها تبسطها وتطيرها من الفرحة ... حغششك  .... النهاردة اجيب لها ورد ... بكرة ابعت رسالة تقدير .. رسالة حب .. رسالة تذكرها بك .. بعده تساعدها وهى بتحضر الاكل (ده لو انت مش بتساعد خالص مع ان الرسول صل الله عليه وسلم كان فى مهنة اهل بيته  ) .. خد الولاد مرة احكيلهم قصة وقولها ريحى انتى دلوقتى ... خليها تخرج مع صحابها وخد الولاد هما ولادك على فكرة  .. لاحظ لبسها .. لاحظ البرفان اللى هى حطاه مخصوص ليك ..حاول على الاقل لو انت ملكش فى شغل البيت انك تشيل هدومك بس من على الارض ... الستات بتجيلى بتعيط من كده والله :))

8. انذار انذار ... متقربش ابدا ولا تهرج على "شكلها" .. لا تعلق على تخن ولا رفع .. ولا على ان الروج واكلة دراعك بيه ولا تقارنها بواحدة تانية... ده فيها اكياس سودا خلى بالك  .. الست بتحب الزينة وبتحب تبقى قمر فى عين زوجها . لو انت حسستها انها حلوة انت مش فاهم هى حتبذل كل حاجة عشان تحافظ على جمالها .. اما لو انتقدت على سبيل طبعا انك بتحاول تغير اللى مش عجبك .... هى بيجيلها ممكن احباط وعدم ثقة فى نظرتك ليها وده بيأثر على جوانب كثر من حياتكم ... مفتاح الست انها تحس بانوثتها ........

9. اديها مساحتها انها تلاقى دائرتها اللى تحقق فيها ذاتها .. بلاش تخنقها ..كل ما تديها مساحتها من غير نقد او تقطيم او تخنيق .. حيعود عليك بسعادة رهيبة ... الست قدراتها العقلية رهيبة .. مينفعش تقفل عليها ... حتركز عليك يا معلم وتتعبك عشان غصب عنها ... انت اللى عامل فى نفسك كده .. شجعها تنفذ حاجة بتحبها واقف جنبها فى التخفيف عنها من احمال الاطفال والمنزل لقيام باى هدف متنفقين عليه انه مناسب

10 . النقطة ده عشان اصالح كل ست زعلت منى .. وااكد لها انى ست مش راجل لابس نقاب  .. وانى مش عجوزة ومش مطلقة ومش متعقدة وبطلع عقدى عليكو :)) ... بص يا سيدى زى ما تحب انها تلبس لك وتتزين لك قبل رؤيتها ... لازم تهتم انت كمان بلبسك ونضافتك وتحط لها برفان كمان .......... انت مش فاهم النقطة ده جوهرية ازاى .... وكم من نساء برضوا لجأوا لمساعدتى اننا تتعايش مع عدم نضافة زوجها او عدم اهتمامه بشكله ولبسه ........ الستات بتحب كل ما هو جميل ... ابدع 

وختامه مسك .. اخر نصيحة ... لو فعلا عايزها كالسيدة خديجة رضى الله عنها ..... أين أنت من محمد؟

صل الله على محمد .. صل الله عليه وسلم ...  الزواج حقوق متبادلة .. كل واحد يقوم بحق التانى .. تخلص المشاكل .. الأمر كله " وَلَهُنَّ مِثْلُ الَّذِي عَلَيْهِنَّ بِالْمَعْرُوفِ ، وَلِلرِّجَالِ عَلَيْهِنَّ دَرَجَةٌ " .. ودمتم بتحبوا بعض 

‫#‏انت_راجل_وهى_ست_الكل‬ 
‫#‏كن_لها_رجلا_كعبدحليم‬
‫#‏الرجالة_القافشة_تفكها_شوية_مراتك_طفشت‬